सेयर बजारमा १ अर्ब १४ करोडको सङ्गठित ठगी : शेखर गोल्छासहित ८१ जनाविरुद्ध मुद्दा दायर

काठमाडौँ । सेयर बजारमा करोडौँ ठगी गरेको अभियोगमा व्यवसायी र बीमा कम्पनीका पदाधिकारीहरू सहित ८१ जनाविरुद्ध काठमाडौँ जिल्ला अदालतमा मुद्दा दायर गरिएको छ । जिल्ला सरकारी वकिल कार्यालय काठमाडौँले धितोपत्र सम्बन्धी ऐन २०६३ अन्तर्गतको कसूरमा उक्त अभियोग पत्र बिहीबार दर्ता गरेको हो।

मुद्दा दायर गरिएका ८१ जनामध्ये नेपालका प्रतिष्ठित व्यावसायिक घरानाका व्यक्तिहरू रहेका छन्। मुख्य प्रतिवादीहरूमा ईन्फिनिटी होल्डिङ्सका सञ्चालक अध्यक्ष दीपक भट्ट, हिमालयन रिइन्स्योरेन्सका तत्कालीन अध्यक्ष शेखर गोल्छा,हिमालयन लाइफ इन्स्योरेन्सका अध्यक्ष तथा शौर्य सिमेन्टका सञ्चालक सुलभ अग्रवाल, भृकुटी स्टक ब्रोकिङ कम्पनी (ब्रोकर नं. ५५) का कार्यकारी अध्यक्ष सन्दीप चाचन अग्रवालसहित रोहित गुप्ता, अमित मोर, ऋषिराज मोर लगायत विभिन्न बिमा कम्पनीका सञ्चालक तथा पदाधिकारीहरू रहेका छन् ।