‘गरिब नचिनेको बजेट’

२८ जेठ, काठमाडौं । ‘नयाँ बजेटबाट कति प्रतिशत नेपाली खुसी भए ?’ अर्थमन्त्री डा. स्वर्णिम वाग्लेलाई सत्तारुढ दल राष्ट्रिय स्वतन्त्र पार्टी (रास्वपा)का सांसद अमरेशकुमार सिंहले सोधेको प्रश्न हो यो ।

अर्थमन्त्री डा. वाग्लेले आगामी आर्थिक वर्ष २०८३/०८४ का लागि २१ खर्ब २४ अर्ब ३४ करोड रुपैयाँ बराबरको बजेट ल्याएका छन् । सांसद अमरेशका नजरमा बजेटको सकारात्मक पक्ष हो, ‘व्यक्तिगत आयकरको सीमा बढेको छ, नयाँ स्टार्टअपको कुरा गरिएको छ र आईटी क्षेत्र समेटिएको छ ।’ तर यसले कति प्रतिशत नेपाली नागरिक खुसी भए भनेर मापन गर्दा सुखद पक्ष भेटाउन गाह्रो हुने अमरेशको भनाइ छ ।