गुगललाई ४.१ अर्ब युरो जरिवाना गर्ने निर्णय सर्वोच्च अदालतबाट सदर

ब्रसेल्स (एजेन्सी)। युरोपेली सङ्घ (इयू) को सर्वोच्च अदालतले अमेरिकी प्रविधि कम्पनी गुगललाई एन्ड्रोइड सञ्चालन प्रणालीमार्फत प्रतिस्पर्धाविरोधी अभ्यास गरेको भन्दै लगाइएको ४.१ अर्ब युरो (करिब ४.७ अर्ब अमेरिकी डलर) जरिवाना यथावत् राखेको छ। अदालतको यो निर्णयसँगै इयूले कुनै प्रविधि कम्पनीमाथि लगाएको सबैभन्दा ठूलो प्रतिस्पर्धाविरोधी जरिवाना कायम भएको छ।

युरोपियन कोर्ट अफ जस्टिसले बिहीबार गुगल र यसको मातृ कम्पनी अल्फाबेटले दायर गरेको अन्तिम पुनरावेदन खारेज गर्दै सन् २०२२ मा भएको तल्लो अदालतको निर्णयलाई सदर गरेको हो। अदालतले अल्फाबेटलाई पनि जरिवानाको दायित्वमा संयुक्त रूपमा जिम्मेवार ठहर गरेको छ।