वाल्मीकि विद्यापीठको नक्ली पत्र बनाएर विदेशीलाई भिसा दिलाउने विरुद्ध लिखत किर्तेमा अनुसन्धान

काठमाडौँ । भृकुटीमण्डपमा सञ्चालित वाल्मीकि विद्यापीठको नक्कली पत्र बनाएर विदेशी नागरिकलाई ‘अध्ययन भिसा’ दिलाएको आरोपमा दुई जना पक्राउ परेका छन् । पर्साको वीरगन्ज महानगरपालिका–९ घर भएका सुबोध शुक्ल र चिनियाँ महिला वाङ्ग जिन्काओ पक्राउ परेका हुन् । उनीहरूलाई बिहीबार पक्राउ गरिएको अध्यागमन विभागका निर्देशक टीकाराम ढकालले रातोपाटीलाई बताए ।

चिनियाँ महिलाबारे विभागले नै अनुसन्धान गरिरहेको छ । सुबोध शुक्ललाई लिखत किर्ते मुद्दामा अनुसन्धान गर्न उपत्यका अपराध अनुसन्धान कार्यालयमा पठाइएको निर्देशक ढकालले बताए । उनले भने, ‘नक्कली कागजातको आधारमा भिसा सिफारिस गरेको भेटिएको छ, त्यसबारे अनुसन्धान गर्न प्रहरीमा पत्राचार गरेका छौँ ।’