बेइजिङमा 'नेपाल-चीन लगानी तथा व्यापार कार्यक्रम २०२६' सम्पन्न

काठमाडौं । नेपाल र चीनबीचको व्यावसायिक सम्बन्ध विस्तार तथा नेपालमा चिनियाँ लगानी भित्र्याउने मुख्य उद्देश्यका साथ चीनको राजधानी बेइजिङमा 'नेपाल-चीन लगानी तथा व्यापार कार्यक्रम २०२६' सम्पन्न भएको छ।

नेपाली राजदूतावास बेइजिङ, चाइना काउन्सिल फर द प्रमोसन अफ इन्टरनेशनल ट्रेड र चाइना च्याम्बर अफ इन्टरनेशनल कमर्सको संयुक्त आयोजनामा उक्त कार्यक्रम आयोजना गरिएको हो। सम्भावित लगानीकर्ता र व्यावसायिक उद्यमहरूबीच अनुभव आदानप्रदान तथा प्रत्यक्ष व्यावसायिक साझेदारी गराउने उद्देश्यले यो कार्यक्रमको आयोजना गरिएको दूतावासले जनाएको छ।