६ जिल्लाका स-साना नदीमा आकस्मिक बाढीको जोखिम

काठमाडौँ । जल तथा मौसम विज्ञान विभाग अन्तर्गतको बाढी पूर्वानुमान महाशाखाले देशका विभिन्न क्षेत्रमा रहेका स-साना नदीहरूमा आकस्मिक बाढी आउन सक्ने चेतावनी दिएको छ। महाशाखाले आज एक बुलेटिन जारी गर्दै आज, भोलि र पर्सीको बाढी पूर्वानुमान सार्वजनिक गरेको हो।

महाशाखाका अनुसार आज कास्की, पर्वत, म्याग्दी, बर्दिया, कैलाली र आसपासका जिल्ला भएर बहने स-साना नदीहरूमा पानीको बहाव उल्लेख्य बढ्ने सम्भावना छ। ती नदीहरूमा आकस्मिक बाढीको न्यून जोखिम रहने महाशाखाले जनाएको छ। यस्तै, भोलि र पर्सी कोशी, बागमती, गण्डकी र मधेस प्रदेश भएर बहने केही स-साना नदीहरूमा पनि पानीको बहाव आकस्मिक रूपमा बढ्न सक्ने पूर्वानुमान गरिएको छ।