खोटाङका गाउँहरूमा वर्षेनि बढ्दै जोखिम र विस्थापन

खोटाङ। खोटाङको जन्तेढुङ्गा गाउँपालिका–२ बोपुङस्थित वासिङ पहिरोले एक शताब्दीभन्दा लामो समयदेखि स्थानीय बासिन्दाको जनजीवन प्रभावित बनाउँदै आएको छ। स्थानीयका अनुसार १९९० सालको महाभूकम्पअघि नै सुरु भएको यो पहिरो अहिलेसम्म नियन्त्रणमा आउन नसक्दा प्रत्येक वर्ष वर्षायाममा थप क्षति व्यहोर्नुपरेको छ।

बुँवाखोलाको आसपासबाट सुरु भएको पहिरोले हालसम्म दर्जनौँ घर, सयौँ रोपनी उर्वर खेतीयोग्य जमिन तथा पुराना पैदलमार्ग बगाइसकेको छ। वर्षा बढेसँगै पहिरोले खोलाको बहावसमेत अवरुद्ध गर्ने भएकाले तल्लो भेगका बस्ती थप जोखिममा पर्ने गरेका छन्।