युएईमा १ अर्ब २३ करोड जितेका पाँच नेपालीले स्वदेशमै लगानी गर्ने, रकम नेपाल भित्र्याउन प्रक्रिया सुरु

काठमाडौं । संयुक्त अरब इमिरेट्स (युएई) मा कार्यरत पाँच नेपाली युवाले चिट्ठामार्फत जितेको ३० मिलियन दिराम (करिब १ अर्ब २३ करोड नेपाली रुपैयाँ) वैधानिक रूपमा नेपाल भित्र्याउने प्रक्रिया सुरु गरेका छन्।

गोरखाका तैयव खान, पाल्पाका सन्दीप बिक, नवलपुरका युवराज गैरे, कास्कीका शिशिर पौडेल र रुपन्देहीका सुदीप न्यौपाने बिहीबार अबुधाबीस्थित नेपाली राजदूतावास पुगेका थिए। उनीहरूले उक्त रकमलाई नेपाल सरकारको नीति र कानुनअनुसार सुरक्षित तथा वैधानिक माध्यमबाट स्वदेश पठाउन आवश्यक सहजीकरण गरिदिन अनुरोध गरेका हुन्।