भ्रष्टाचारविरुद्व युवा जागरण

मुगु । तीन वर्षअघि सोरु गाउँपालिकाको तारापानीमा आएको बाढीपहिरो प्रभावितको पुनस्र्थापना एवं राहतका लागि विनियोजित रकम वितरणमा भएको ढिलाइ र लापरबाही, कोभिड–१९ महामारीका बेला सोरु गाउँपालिकाले गरेको स्वास्थ्य सामग्री खरिद तथा वितरणमा देखिएको अनियमितता तथा लापरबाही, विभिन्न विकास आयोजनाहरूमा देखिएको अनियमितताका बारेमा युवाहरुको समूहबीच छलफल भएको छ । मुगु जिल्लाका हरेक अनियमितता तथा भ्रष्टाचारको आरोप लागेका विषयहरुमा समेत छलफल भएको छ ।

युवाहरूका अनुसार रोजगारी, गुणस्तरीय शिक्षा, स्वास्थ्य सेवा तथा उज्ज्वल भविष्यको खोजीमा मुगुका गाउँहरुबाट शहरतर्फ बसाइँ सराइ तीव्र बन्दै गएको छ । जसका कारण गाउँहरूमा वृद्धवृद्धा, अत्यन्त गरिब नागरिक तथा सीमित अवसर प्राप्त व्यक्तिहरू मात्र बस्न बाध्य भएका छन् । यसले ग्रामीण क्षेत्रको सामाजिक तथा आर्थिक संरचनामै गम्भीर असर पारेको उनीहरूको निष्कर्ष छ ।