१० वाम दल मिलेर ‘नेपाली कम्युनिस्ट पार्टी’ घोषणा, संयोजकमा दाहाल, सहसंयोजक नेपाल

काठमाडौँ — माओवादी, एकीकृत समाजवादी र अन्य साना वाम घटकबीच एकता भएको छ । १० वामपन्थी दल एकीकृत भई ‘नेपाली कम्युनिस्ट पार्टी’ घोषणा भएको हो । बुधबार काठमाडौंको भृकुटीमण्डपमा भएको ‘एकता महाधिवेशन’ ले पार्टी संयोजकमा पुष्पकमल दाहाल र सहसंयोजकमा माधवकुमार नेपाललाई चयन गरेको छ । यसअघि दाहाल माओवादीका संयोजक र नेपाल एकीकृत समाजवादीका अध्यक्ष थिए ।

आगामी ६ महिनाभित्र महाधिवेशन गर्ने तय भएको यो पार्टीमा करिब एक हजार केन्द्रीय सदस्य रहनेछन् । एकतापछि माओवादीले ‘माओवाद’, चुनाव चिह्न ‘गोलाकारभित्र हँसिया हथौडा’ र समाजवादीले चुनाव चिह्न ‘कलम’ छाडेका छन् । नवगठित पार्टीको चुनाव चिह्न सुभाषराज काफ्लेले निर्वाचन आयोगमा दर्ता गरिसकेको जनसमाजवादी पार्टीको ‘पाँच कुने तारा’ लिइएको छ ।