आन्तरिक पर्यटनमा नेपालीको उत्साह - एक वर्षमै खर्चिए ४ खर्ब ५९ अर्ब, जिडिपीमा २.६५ प्रतिशत योगदान

राष्ट्रिय तथ्याङ्क कार्यालयले सार्वजनिक गरेको सर्वेक्षण ‘आन्तरिक पर्यटन सर्वेक्षण २०८१/८२’ अनुसार नेपालको राष्ट्रिय अर्थतन्त्रमा आन्तरिक पर्यटनको योगदान उल्लेखनीय देखिएको छ।

आर्थिक वर्ष २०८१/८२ मा यस क्षेत्रले देशको कुल गार्हस्थ्य उत्पादन (जिडिपी) मा २.६५ प्रतिशत हिस्सा ओगटेको छ। देशभरका ४४४ गणना क्षेत्रका ५ हजार ३२८ घरपरिवारलाई नमुनाका रूपमा छनोट गरी ‘टु-स्टेज स्ट्रेटिफाइड स्याम्पलिङ डिजाइन’ विधिबाट गरिएको यस सर्वेक्षणले नेपालका कुल ६९ लाख १० हजार घरपरिवारमध्ये ५२.४ प्रतिशत (३६ लाख २१ हजार) घरपरिवार कम्तीमा एकपटक पर्यटकीय गतिविधिमा सहभागी भएको देखाएको छ।