वीरगन्जको मेनरोडमा आजदेखि फेरि चल्यो डोजर

वीरगन्ज : त्रिभुवन राजपथअन्तर्गत पर्ने वीरगन्जको मेन रोड (मुख्य सडक)को क्षेत्रमा रहेका संरचनाहरूमाथि शुक्रबारदेखि फेरि डोजर चलेको छ।पहिलो चरणमा गत वैशाख ६ र ७ गते डोजर चलाएपछि करिब अढाई महिनादेखि अलपत्र परेको मेनरोड विस्तारको काम शुक्रबारदेखि फेरि सुरु गरिएको हो।

गत वैशाख ६ र ७ गते सडक विभागले पहिलो चरणमा सडक सीमा क्षेत्रमा (दायाँ-बायाँ २५/२५ मिटर) पर्ने घर, भवन लगायतका संरचना डोजर लगाएर भत्काएको थियो। त्यस क्षेत्रमा रहेका बाँकी संरचनाहरु २५ दिनभित्र खाली गर्न अनुरोध गर्दा पनि सम्बन्धित घरजग्गा धनीहरूले खाली नगरेपछि सडक विभागले शुक्रबारदेखि फेरि डोजर लगाएर बाँकी संरचनाहरु हटाउन सुरु गरेको हो।