मन्त्रालयको प्रगति विवरण - अन्तर्राष्ट्रिय जलवायु वित्त परिचालनदेखि वन डढेलो बीमासम्म

काठमाडौँ । वर्तमान सरकार गठन भएयता कृषि, वन तथा पर्यावरण मन्त्रालयले वातावरणीय प्रभाव मूल्याङ्कन प्रक्रियामा सहजता, कार्बन व्यापारको रकम परिचालन, जलवायु वित्तको प्राप्ति र पर्यावरण संरक्षणका क्षेत्रमा उल्लेखनीय प्रगति हासिल गरेको छ। सरकारले विकास निर्माणलाई गति दिन र सेवाप्रवाहमा चुस्तता ल्याउन कानुनी सुधारका प्रक्रिया अघि बढाएको छ।

यसै क्रममा अध्यादेशमार्फत वन ऐन संशोधन गरी कार्यान्वयनमा ल्याइएको छ भने वातावरण संरक्षण र राष्ट्रिय निकुञ्जसम्बन्धी ऐन तथा नियमावलीहरूको नयाँ मस्यौदा तयार पारिएको छ। कार्बन नियमावली स्वीकृत भएसँगै कार्बन रजिस्ट्रीमार्फत व्यापार सहज भएको छ र यसबाट प्राप्त हुने रकम वन विकास एवं समुदायको जीविकोपार्जनमा खर्च गर्न बाँके, बारा, रूपेन्देही र चितवनका डिभिजन वन कार्यालयहरूमा विशेष संरचना समेत खडा गरी स्थानीय पदाधिकारीलाई तालिम दिइएको छ।