हिरासतमा सुलभसँग आइप्याड फेला परेपछि प्रहरीमाथि छानबिन गर्न समिति

काठमाडौं । सम्पत्ति शुद्धीकरणको कसुरमा पक्राउ परेका व्यवसायी सुलभ अग्रवाललाई सुविधा र डिजिटल ग्याजेट (आइप्याड) प्रयोग गर्न दिएको भन्दै प्रहरीमाथि नै उच्चस्तरीय छानबिन सुरु भएको छ ।

जिल्ला प्रहरी परिसर ललितपुरको हिरासतमा रहेको समयमा व्यवसायीद्वय सुलभ अग्रवाल र दीपक भट्टलाई नियमविपरीत सुविधा दिएको उजुरी परेपछि काठमाडौं उपत्यका प्रहरी कार्यालय, रानीपोखरीले छानबिन समिति गठन गरेको हो । कार्यालयका डीआईजी ओम अधिकारीको नेतृत्वमा समिति गठन भएको हो ।