बाढीकाे कहर: उद्योगी व्यवसायीलाई प्याकेज, सर्वसाधारणलाई गाँसबासकै चिन्ता

भोटेकोसी र त्रिशूली नदीमा भदौ १० गते आएको बाढीबाट प्रभावित व्यवसायीका लागि सरकारले राहत प्याकेज ल्याएको छ। सरकारले ल्याएको राहत प्याकेजमा व्यवसायीलाई कर छुटदेखि ऋण पुनर्संरचनासम्मका सुविधा छन्। सरकारले व्यवसाय पुनरुत्थानका लागि प्याकेज घोषणा गरेको हो।

अर्थ मन्त्रालयले बाढी प्रभावित व्यवसायीका लागि तयार पारेको राहत प्याकेज बिहीबार बसेको मन्त्रिपरिषद् बैठकले स्वीकृत गरेको छ तर बाढीबाट घर र परिवार दुवै गुमाएकाहरूका हकमा भने सरकारले कुनै निर्णय गरेको छैन। बाढीमा बेपत्ताको सास नभए लासको अपेक्षामा रहेका आफन्त गाँस, बाससहित पुनःस्थापनाको चिन्तामा छन्।