[अर्काइभ] चिकित्सा विज्ञानकै लागि नौलो त्यो घटना...

काठमाडौँ — तीन महिनाको बच्चाको पेटमा अर्को बच्चा ! सुन्दै पनि अपत्यारिलो लाग्ने ३२ वर्षअघिको उक्त घटना कान्ति बाल अस्पतलमा देखिएको थियो । सालनालसहित हातखुट्टा र मेरुदण्डसहितको शरीर विकसित भएको छोराका रूपमा रहेको उक्त बच्चा भेटिएपछि चिकित्सकहरूले यसलाई विश्वमा हुने एक–दुईवटा घटनामध्येको भएको बताएका थिए ।

तीन महिनाको एक बच्चा कान्ति बाल अस्पतालमा उपचारार्थ भर्ना गरिएको थियो । शल्यक्रिया गरेर अचम्मको बच्चा निकालिएको थियो । शल्यक्रिया गरिएका तीन महिनाका सूर्यलाल खुलालको स्वास्थ्यमा भने सुधार भयो । खुलाल बारास्थित आफ्नै घरमा निजगढ रोड टोलमा २०५१ असोज १७ मा जन्मेका थिए ।