बालाजु होल्डिङ सेन्टरका सुकुम्बासीले गृहमन्त्रीलाई भने- बसाइ छ तर भविष्य छैन

काठमाडौँ- सुकुम्बासी परिवारहरू हाल बालाजु नयाँ बसपार्कस्थित दुई होल्डिङ सेन्टरमा अस्थायी रूपमा बसिरहेका छन्। तत्कालका लागि खाने, बस्ने र आधारभूत सुरक्षाको व्यवस्था भए पनि उनीहरूको मनमा भने स्थायित्व, सुरक्षित आवास र भविष्यप्रति गहिरो अनिश्चितता कायम छ। होल्डिङ सेन्टरभित्रका अधिकांश परिवारले आफूहरूलाई ‘बस्न दिएको ठाउँ मात्र पाइयो, जीवन भने अझै सडकमा जस्तै छ’ भन्ने अनुभूति व्यक्त गरेका छन्।

शुक्रबार (२८ जेठ) गृहमन्त्री सुधन गुरुङले उक्त होल्डिङ सेन्टरहरूको आकस्मिक अनुगमन गर्दै प्रभावित परिवारसँग प्रत्यक्ष संवाद गरेका थिए। मन्त्रीसँगको भेटपछि केही आशा देखिए पनि विस्थापितहरूको प्रमुख माग भने दीर्घकालीन पुनःस्थापना नै रहेको छ। उनीहरूका अनुसार सरकार र स्थानीय निकायले तत्काल राहत दिए पनि स्थायी समाधान नहुँदा जीवन अझै असुरक्षित छ।