राष्ट्रसेवक कि जीविकाका लागि संघर्षरत मजदुर ?

नेपालको राज्य संरचनाले विगत सात दशकमा अनेक राजनीतिक रूपान्तरणहरू देख्यो। राणाशासनको अन्त्य, प्रजातन्त्र, पञ्चायत, बहुदलीय व्यवस्था, गणतन्त्र र संघीय शासन प्रणालीसम्म आइपुग्दा शासनका स्वरूप फेरिए, संविधान फेरिए, राजनीतिक नेतृत्व फेरियो । तर एउटा वर्ग भने निरन्तर राज्यको मेरुदण्डका रूपमा कायम रह्यो-राष्ट्रसेवक कर्मचारी वर्ग।

विडम्बना के छ भने राज्य सञ्चालनको आधार मानिएको यही वर्ग आज पनि सम्मान, सुरक्षा र जीवन निर्वाहको दृष्टिले सबैभन्दा बढी द्विविधामा परेको वर्गका रूपमा देखिन्छ। राजनीतिक दलहरूले परिवर्तनका नारा दिए, राज्यका संरचनाहरू पुनर्गठन भए, तर “राज्यले कस्तो कर्मचारी चाहन्छ?” भन्ने मूलभूत प्रश्नको उत्तर भने अझै स्पष्ट हुन सकेको छैन।