बजेट छलफलमा अर्थमन्त्री अनुपस्थित भएकोमा अमरेशको आपत्ति

काठमाडौँ । सत्तारूढ दल राष्ट्रिय स्वतन्त्र पार्टी (रास्वपा) का सांसद डा. अमरेशकुमार सिंहले विनियोजन विधेयकको सिद्धान्त र प्राथमिकता (प्रि-बजेट) माथिको छलफलमा अर्थमन्त्री डा. स्वर्णिम वाग्ले उपस्थित नभएको भन्दै कडा आपत्ति जनाएका छन्।

मंगलबार बसेको प्रतिनिधि सभा बैठकमा सो विधेयकमाथिको जारी छलफलमा भाग लिँदै उनले सरकारले नयाँ र परम्परा तोड्ने नाममा गर्दै नहुने काम गरिरहेकाले आफू संसद्मा बोल्न बाध्य हुनुपरेको स्पष्ट पारे। सांसद सिंहले संसदीय व्यवस्थामा संसद्मा बजेट वा प्रि-बजेटबारे छलफल हुँदा अर्थमन्त्री अनिवार्य उपस्थित हुनुपर्ने स्थापित परम्परा रहेको र त्यसलाई सरकारले दृढतापूर्वक पालना गर्नुपर्ने बताए। अर्थमन्त्री अनुपस्थित रहेर सरकारले संसद्को औचित्य नै समाप्त पार्ने अवस्था ल्याउन खोजेको आरोप समेत उनले लगाए।