गुगल क्रोमको नयाँ नीति: अब एड-ब्लकर प्रयोग गर्न कठिन हुने, विज्ञापन हेर्नैपर्ने बाध्यता

काठमाडौँ । वेब ब्राउजर गुगल क्रोमले ल्याउन लागेको नयाँ परिवर्तनका कारण प्रयोगकर्ताले अब प्रभावकारी रूपमा एड-ब्लकर (विज्ञापन रोक्ने एक्स्टेन्सन) प्रयोग गर्न नसक्ने भएका छन् । गुगलले एक्स्टेन्सन सञ्चालनसम्बन्धी नियमको पुरानो सेट ‘म्यानिफेस्ट भी२’ लाई विस्तारै बन्द गर्दै नयाँ नीति ‘म्यानिफेस्ट भी३’ अनिवार्य गरेपछि एड-ब्लकर प्रयोगविहीन हुने अवस्था आएको हो ।

गुगलले यस कदमलाई सुरक्षा र ब्राउजरको क्षमता सुधारसँग जोडेर हेरे पनि यसबाट प्रयोगकर्ता विज्ञापन हेर्न बाध्य हुने विश्लेषण गरिएको छ । गत वर्ष सार्वजनिक भएको क्रोमको १२७ भर्सनबाटै सुरु भएको यो प्रक्रियाका कारण सबैभन्दा बढी रुचाइएको एड-ब्लकिङ एक्स्टेन्सन ‘यूब्लक ओरिजिन’ क्रोममा निष्क्रिय भइसकेको छ ।