एथ्लेटिक क्लबमाथि बार्सिलोनाको सहज जित

काठमाडौं- स्पेनिस ला लिगाको नयाँ सिजनमा बार्सिलोनाले लगातार दोस्रो जित निकालेको छ। घरेलु मैदानमा बिहीबार राति भएको खेलमा बार्सिलोनाले एथ्लेटिक क्लबलाई २-० गोल अन्तरले पराजित गरेको थियो।

बार्सिलोनाको जितमा कप्तान राफिन्हा र फर्मिन लोपेजले गोल गरेका थिए। राफिन्हाले खेलको ३७औँ मिनेटमा गोल गर्दै घरेलु टोलीलाई अग्रता दिलाएका थिए। पहिलो हाफमा बार्सिलोनाले थप गोलका अवसर सिर्जना गरेको थियो। तर एथ्लेटिक क्लबका गोलरक्षक उनाइ सिमोनले उत्कृष्ट बचाउ गर्दै टोलीलाई खेलमा कायम राखेका थिए। दोस्रो हाफमा एथ्लेटिक क्लबले बराबरी गोलका लागि प्रयास गरेको थियो। तर बार्सिलोनाले खेलमा दबाब कायम राखेको थियो। खेलको ८२औँ मिनेटमा फर्मिन लोपेजले गोल गर्दै बार्सिलोनाको अग्रता दोब्बर बनाएका थिए। त्यसपछि एथ्लेटिक क्लबले गोल फर्काउन नसकेपछि बार्सिलोनाले २-० को जित सुनिश्चित गरेको थियो।