कक्षाकोठा छाडेर फेरि सडकमा आउँदै गुरूहरू

काठमाडौं । सरकारसँग भएको सहमति कार्यान्वयन नभएको भन्दै देशभरका शिक्षक पुनः आन्दोलनमा उत्रने भएका छन् । नेपाल शिक्षक महासंघले भदौ महिनादेखि चरणबद्ध आन्दोलन गर्ने चेतावनी दिँदै सरकारले तत्काल विगतका प्रतिबद्धता कार्यान्वयन नगरे आन्दोलन अघिल्लोभन्दा सशक्त हुने जनाएको छ ।

महासंघको साउन १६ र १७ गते बसेको केन्द्रीय परिषद् बैठकले सरकारसँग भएको सहमति कार्यान्वयन नभए आन्दोलनमा जाने निर्णय गरेको हो। महासंघका अध्यक्ष लक्ष्मीकिशोर सुवेदीले विगतका सरकारहरूले पटक–पटक सहमति गरेर कार्यान्वयन नगरेको आरोप लगाउँदै वर्तमान सरकारले पनि त्यसैलाई निरन्तरता दिए आन्दोलन अपरिहार्य हुने बताए ।