गुप्तचर निकाय प्रधानमन्त्री मातहत राख्दा शासन प्रणाली कमजोर हुन्छ : निश्कल राई

नेपाली कांग्रेसका सचेतक निश्कल राईले गुप्तचर निकायलाई प्रधानमन्त्री तथा मन्त्रिपरिषद्को कार्यालय मातहत राख्ने व्यवस्थाले मुलुकको शासन प्रणाली कमजोर हुनुका साथै संस्थागत सन्तुलनसमेत बिग्रने बताएका छन्।

राज्य व्यवस्था तथा सुशासन समितिको बैठकमा ‘नेपाल विशेष सेवा ऐन, २०४२’ को संशोधन विधेयकमाथिको छलफलमा भाग लिँदै सचेतक राईले यस्तो तर्क गरेका हुन्। उनले प्रधानमन्त्री कार्यालयको मूल कार्य रणनीतिक नेतृत्व, अन्तर मन्त्रालय समन्वय र राष्ट्रिय प्राथमिकता निर्धारण गर्नु रहेको र उक्त कार्यालयलाई दैनिक प्रशासनिक र प्राविधिक कार्यमा अल्झाउन नहुने बताए ।