रास्वपा सांसद पाण्डेको दाबी: करिडोर विस्तार सेनाकै समन्वयमा

गोकर्णस्थित बागमती करिडोर विस्तारका क्रममा नेपाली सेनासँग विवाद भएको चर्चा भइरहेका बेला राष्ट्रिय स्वतन्त्र पार्टी (रास्वपा) का सांसद राजुनाथ पाण्डेले अन्ततः सेनाकै समन्वय र सहयोगमा सडक विस्तारको काम सम्पन्न भएको दाबी गरेका छन्।

मंगलबार विज्ञप्ति जारी गर्दै पाण्डेले सडक विस्तारको क्रममा सम्बन्धित नेपाली सेनाको टुकुडीसम्म आवश्यक जानकारी पुग्न केही मिनेट ढिलाइ हुँदा प्रारम्भिक रूपमा असहज अवस्था सिर्जना भएको स्वीकार गरेका छन्। त्यसपछि भने नेपाली सेनाका प्रमुख सेनानीसँग समन्वय र छलफल गरी सेनाकै सहयोगमा काम सम्पन्न गरिएको उनको भनाइ छ।