विश्वकै वृद्ध बिरालोले मनायो जन्मदिन

बेलायतको ग्रेटर म्यानचेस्टरमा बस्ने मिल्ली नामकी बिरालोले हालै आफ्नो ३१औँ जन्मदिन मनाएकी छिन्। उनका मालिक लेस्ली ग्रीनहफले मिल्ली अहिले विश्वकै सबैभन्दा वृद्ध जीवित बिरालो भएको दाबी गरेका छन्।

सन् १९९५ मा जन्मिएकी मिल्लीलाई लेस्लीकी दिवंगत श्रीमतीले तीन महिनाको हुँदा घरमा ल्याएकी थिइन्। अहिले ७१ वर्षीय लेस्लीका अनुसार मिल्लीको लामो आयुको रहस्य प्राकृतिक खनिज पानी, मनपर्ने खाना र भरपूर माया हो। उनी भन्छन्, “मिल्लीले पछिल्लो १० वर्षदेखि खनिज पानी मात्र पिउँछिन्। उनलाई सामन माछा, झिँगा, कुखुराको मासु र टुना निकै मनपर्छ।”