सुर्तीजन्य पदार्थ ऐन २०६८ संशोधन हुँदै: शतप्रतिशत चेतावनीमूलक चित्रका साथै ई-सिगरेट र भेप्स पनि कानुनी दायरामा

काठमाडौं- सरकारले सुर्तीजन्य पदार्थ (नियन्त्रण तथा नियमन) ऐन, २०६८ संशोधनको प्रक्रिया अघि बढाएको छ। स्वास्थ्य तथा खाद्य स्वच्छता मन्त्रालयले संशोधन विधेयकको मस्यौदा आवश्यक सुझावका लागि आफ्नो वेबसाइटमार्फत सार्वजनिक गरेको हो।

प्रस्तावित संशोधनमा पहिलोपटक विद्युतीय चुरोट (ई–सिगरेट), भेप्स, हिटेड टोबाको, निकोटिन पाउच, निकोटिन साल्ट, ई–जुस/ई–लिक्विड, हुक्का र शिशालाई समेत सुर्तीजन्य पदार्थको परिभाषाभित्र समेटिएको छ। साथै, धूम्रपानको परिभाषा पनि धुँवा मात्र नभई वाफ (भेपर) को रूपमा गरिने सेवनलाई समेत समेट्ने गरी विस्तार गरिएको छ।