सेना र सांसद पाण्डे विवाद : हुकुमी शैली र चुलबुल पाण्डे प्रवृत्ति निन्दनीय, सेनालाई अपमान नगरेको पाण्डेको प्रष्टिकरण

सत्तारुढ दल राष्ट्रिय स्वतन्त्र पार्टी (रास्वपा) का सांसद राजुनाथ पाण्डे र नेपाली सेनाका एक अधिकृतबीच काठमाडौंको गोकर्ण क्षेत्रमा करिडोर विस्तारका क्रममा भएको विवादको भिडियो सार्वजनिक भएपछि नयाँ बहस सिर्जना गरेको छ। घटनाप्रति नेपाली सेनाले आपत्ति जनाएको छ भने जेनजी अभियन्ताहरूले राज्यका संस्थामाथिको प्रहार भएको बताएका छन्।

गोकर्णस्थित नेपाल ट्रस्टको स्वामित्वमा रहेको जग्गामा नेपाली सेनाको विपद् व्यवस्थापन तालिम केन्द्रको पर्खाल करिडोर विस्तारका क्रममा हटाउने विषयलाई लिएर पाण्डे र सेनाका अधिकृतबीच केहीबेर भनाभन भएको थियो। भिडियोमा सेनाका अधिकृतले पर्खाल नभत्काउन र आवश्यक अनुमति तथा समन्वयको माग गर्दै गर्दा सांसद पाण्डेले करिडोरको मापदण्ड सबैका लागि समान रूपमा लागू हुने बताएका थिए।