रास्वपा महामन्त्री आचार्यको प्रष्टिकरण: मागपत्र बुझ्नु र सहमति गर्नु फरक कुरा हो

राष्ट्रिय स्वतन्त्र पार्टी (रास्वपा) का महामन्त्री विपिनकुमार आचार्यले सरकारले कुनै समूहसँग सहमति नगरेको, केवल मागपत्र बुझेको बताएका छन्। हिन्दु राष्ट्र कायम गर्न माग गर्ने समूहसँग सरकारले गरेको भनिएको सहमतिबारे स्पष्ट पार्दै उनले मागपत्र बुझ्नु र सहमति गर्नु फरक विषय भएको बताएका हुन्।

मंगलबार संघीय संसद् भवनबाहिर सञ्चारकर्मीसँग कुरा गर्दै आचार्यले लोकतन्त्रमा नागरिकका फरक मत र माग सुन्नु राज्यको दायित्व भएको बताए। उनले राज्यले नागरिकका माग बुझ्नु स्वाभाविक प्रक्रिया भए पनि त्यसलाई सहमति भएको रूपमा बुझ्न नहुने उल्लेख गरे।