‘ब्लु बस’ योजनामा कुलमान : रङ परिवर्तनभन्दा सोच परिवर्तन आवश्यक छ

उज्यालो नेपाल पार्टीका अध्यक्ष कुलमान घिसिङले राष्ट्रिय स्वतन्त्र पार्टी (रास्वपा) नेतृत्वको सरकारले ल्याएको ‘ब्लु बस’ योजनामाथि प्रश्न उठाएका छन्।

उनले महिलाको सुरक्षाका लागि विशेष व्यवस्था गर्नु सकारात्मक भए पनि साझा यातायातको ‘हरियो’ पहिचानलाई रङ परिवर्तन गरेर कमजोर बनाउनु उपयुक्त नहुने बताएका छन्। उनले सामाजिक सञ्जालमा भनेका छन्, ‘साझा यातायातले विद्युतीय सवारी (इभी) प्रवर्द्धन गर्दै हरित र दिगो सार्वजनिक यातायातको सन्देश दिन वर्षौंदेखि अपनाउँदै आएको हरियो पहिचानलाई रङ परिवर्तन गरेर कमजोर बनाइनु उपयुक्त देखिँदैन। हरियो रङ केवल रङ मात्र होइन, वातावरणमैत्री सार्वजनिक यातायातप्रतिको प्रतिबद्धताको प्रतीक पनि हो। हामी हरेक क्षेत्रलाई हरित बनाउँछौँ भन्ने राष्ट्रिय संकल्प पनि हो। महिलाका लागि निःशुल्क वा विशेष बस सञ्चालन गर्नु स्वागतयोग्य पहल हो।’