रोजगार सेवा केन्द्रलाई रूपान्तरण गरिने, सरकारले ल्यायो नयाँ कार्यविधि

काठमाडौँ । सरकारले स्थानीय तहमा रहेका रोजगार सेवा केन्द्रहरूलाई थप सुदृढ र बहुआयामिक बनाउने गरी रोजगार, सीप तथा उद्यमशीलता केन्द्रका रूपमा रूपान्तरण गर्ने भएको छ । युवा, श्रम तथा रोजगार मन्त्रालयले रोजगार, सीप तथा उद्यमशीलता सम्बन्धी एकीकृत सेवा प्रवाह कार्यविधि, २०८३ स्वीकृत गरेको हो ।

उक्त कार्यविधि स्वीकृतसँगै अब स्थानीय तहबाटै रोजगारी, सीप विकास र उद्यमशीलताका सेवाहरू एकीकृत रूपमा प्रवाह हुने भएको छ । मन्त्रालयले रोजगारीको हक सम्बन्धी ऐन, २०७५ को दफा ३२ ले दिएको अधिकार प्रयोग गरी यो नयाँ कार्यविधि जारी गरेको जनाएको छ ।