आन्तरिक किचलोबीच बागमतीमा बजेट पारित गराउने कांग्रेसको रणनीति, सांसदलाई जारी गर्यो तीन लाइन ह्विप

हेटौँडा- बागमती प्रदेश सरकारको आगामी आर्थिक वर्ष २०८३/८४ को विनियोजन विधेयक पारित गराउन नेपाली कांग्रेसले आफ्ना प्रदेशसभा सदस्यहरूलाई तीन लाइन ह्विप जारी गरेको छ। कांग्रेस संसदीय दलको बैठकले सबै सांसदलाई अनिवार्य रूपमा प्रदेशसभा बैठकमा उपस्थित भएर बजेटको पक्षमा मतदान गर्न निर्देशन दिएको हो।

कांग्रेस बागमती प्रदेश संसदीय दलका मुख्य सचेतक पुकार महर्जनले शनिबार बिहान ११ बजे बस्ने प्रदेशसभा बैठकलाई लक्षित गर्दै ह्विप जारी गरेका हुन्। ह्विपमा आर्थिक मामिला तथा योजना मन्त्रीले पेस गरेको विनियोजन विधेयक निर्णयार्थ प्रस्तुत हुने भएकाले सबै सांसदलाई उपस्थित हुन, तटस्थ नबस्न र विधेयकको पक्षमा मत दिन भनिएको छ।