सरकारले दिएको समयमा कसैले छाडेनन् होल्डिङ सेन्टर

सुकुम्बासी तथा भूमिहीन परिवारलाई होल्डिङ सेन्टर छाड्न दिएको समय सरकारले एकसाता थप गरेको छ। अधिकार सम्पन्न बागमती सभ्यता एकीकृत विकास समितिले सुकुम्बासीहरुको विवरण संकलन भइरहेकाले तत्कालका लागि सात दिनको समय थप गरिएको बताएको हो।

आयोजनाका सदस्य सचिव तथा पूर्वाधार विकास मन्त्रालयका सहसचिव मचाकाजी महर्जनले रकम निकासा गर्न समय लागेकाले अहिलेसम्म एकजना सुकुम्बासीले होल्डिङ सेन्टर नछाडेको जानकारी दिए। विवरण संकलनको काम पनि बाँकी रहेकाले एकसाता भित्र सम्पूर्ण प्रक्रिया पूरा गरी सुकुम्बासीहरुलाई स्व–व्यवस्थापन गरी सेन्टर खाली गराइने उनको भनाइ छ। सरकारले गत सोमबार सूचना निकाल्दै पाँच दिनभित्र अर्थात् शुक्रबारसम्ममा सेन्टर खाली गर्न सुकुम्बासीलाई अल्टिमेटम दिएको थियो ।