थाइल्याण्डले गर्‍यो ९३ देशको ६० दिने भिसा सुविधा खारेज

काठमाडौँ । थाइल्याण्ड सरकारले आफ्नो देशको भिसा नीतिमा व्यापक परिमार्जन गरेको छ। मङ्गलवार बसेको थाइ मन्त्रिपरिषद् बैठकले ९३ देश तथा क्षेत्रका पर्यटकहरूका लागि उपलब्ध गराइँदै आएको ६० दिने भिसा-मुक्त (भिसा-एग्जेम्प्सन) प्रवेश सुविधा पूर्ण रूपमा खारेज गर्ने निर्णय गरेको हो।

कन्सुलर मामिला विभागका महानिर्देशक मुङकोर्न प्रतुमकाउले पत्रकार सम्मेलनमा दिएको जानकारीअनुसार भिसा सुविधामा हुने दोहोरोपन र अन्योल हटाउन अबदेखि प्रत्येक देश वा क्षेत्रका लागि केवल एउटा मात्र भिसा छुट योजना लागू गरिनेछ। उनले यसअघि ९३ वटा देशहरूले पाउँदै आएको ६० दिने भिसा छुट योजना अब इतिहास बनेको स्पष्ट पारे।