पाठक–पत्र : फलाक नाका सञ्चालनमा आउने आशा

दोलखाको बिगु गाउँपालिका वडा नम्बर–१, लामाबगरस्थित फलाक नाका पुग्ने लामाबगर–फलाक ८ किलोमिटर सडक दुई निजी जलविद्युत् आयोजना– सानीमा र दुगड, बिगु गाउँपालिका र बागमती प्रदेश सरकारको पहलमा निर्माण भइरहेको समाचार छ । करिब ५ सय मिटर सडक निर्माण भएपछि फलाक नाकासम्म यातायात सञ्चालन हुने बिगु गाउँपालिका वडा नम्बर–१ का वडा अध्यक्ष मेमबहादुर तमाङले बताएको समाचारमा उल्लेख छ ।

लामाबगर–फलाक ८ किलोमिटर सडकमध्ये माथिल्लो तामाकोशी जलविद्युत् आयोजनाको ड्यामनजिक ११४५ मिटर सुरुङमार्ग निर्माण गरिएको छ । लामाबगरको प्रवेशमार्ग दोलखा–सिंगटी ३६ किलोमिटर र सिंगटी–लामाबगर २८ किलोमिटर सडक माथिल्लो तामाकोशी जलविद्युत् आयोजनाको सहयोगमा निर्माण भइसकेको छ ।