व्यक्तिको नाममा रहेको जग्गा विद्यालयको लेटरप्याडबाटै किनबेच !

विराटनगर । मोरङको कानेपोखरी गाउँपालिका–६ (साविक बयरवन–८) स्थित जनसेवा माध्यमिक विद्यालयले आफ्नो लेटरप्याड प्रयोग गरेरै व्यक्तिको जग्गा बिक्री र नामसारी गरेको फेला परेको छ । जग्गा बिक्री तथा नामसारी गर्ने अधिकार भूमिसुधार तथा मालपोत कार्यालयको हो । यद्यपि विद्यालयले नै मालपोतको काम गरेको पाइएको हो, त्यो पनि व्यक्तिको जग्गा विद्यालयको लेटरप्याड प्रयोग गरी बिक्री भएको हो ।

उक्त जग्गा ६२ वर्षीय रोहितराम फुयालको नाममा छ । फुयालसँग अहिले पनि जग्गाको लालपुर्जा छ । उनले अहिलेसम्म सरकारलाई तिरो (कर) तिरिरहेका छन्, तर उनको १४ कट्ठा ३ धुर नम्बरी जग्गामा १४ परिवारले घर बनाएर बसेका छन् । ती परिवारसँग जग्गा स्वामित्वबारे विद्यालयले बनाएर दिएको कागज छ ।