दूरसञ्चार प्राधिकरणको अध्यक्षमा यी ९ जनाको दाबेदारी, अन्तरवार्ता पनि तय

काठमाडाैं । नेपाल दूरसञ्चार प्राधिकरणको रिक्त अध्यक्ष तथा विभिन्न सदस्य पदहरूका लागि शर्टलिस्ट सार्वजनिक भएको छ। सूचना तथा सञ्चार प्रविधि मन्त्रालयले आवेदन दिएका उम्मेदवारहरूमध्येबाट योग्यता र अनुभवका आधारमा संक्षिप्त सूची तयार गरी अन्तरवार्ता र कार्ययोजना प्रस्तुतिकरणको मिति समेत तय गरेको हो।

मन्त्रालयका अनुसार प्राधिकरणको सर्वोच्च पद अध्यक्षका लागि ९ जना उम्मेदवारहरू शर्टलिस्टमा पर्न सफल भएका छन्। शर्टलिस्टमा पर्नेहरूमा अर्जुन घिमिरे, अनन्त मान सिंह, अनिल कुमार झा, अमलेन्दु नारायण सिंह, जनार्दन भट्ट, मधु सुदन दाहाल, राजिब सुब्बा, सलाउल्लाह खान र सुशिल प्रसाद साह रहेका छन्। यी उम्मेदवारहरूको व्यावसायिक कार्ययोजना प्रस्तुतिकरण र अन्तरवार्ता आउँदो बुधबारका लागि तय गरिएको छ।