दुर्गन्धबाट मुक्त हुँदै बाम्का बजार

बाजुराको बुढीगङ्गा नगरपालिका–६ मा रहेको बाम्का बजार लामो समयदेखि फैलिएको दुर्गन्धबाट विस्तारै मुक्त हुँदै गएको छ। बजार क्षेत्रमा जथाभावी दिसापिसाब गर्ने तथा फोहरमैला व्यवस्थापन नहुँदा बाम्का बजार लामो समयदेखि दुर्गन्धित बन्दै आएको थियो।

हाल बाम्का बजार व्यवस्थापन समितिको पहलमा फोहरमैला व्यवस्थापनलाई प्राथमिकता दिइएपछि बजारको अवस्था सुधार हुँदै गएको हो। जिल्लाको तल्लो क्षेत्रको प्रमुख व्यापारिक केन्द्रका रूपमा रहेको यो बजारबाट त्रिवेणी, बुढीगङ्गा र खप्तड छेडेदह लगायतका स्थानीयले दैनिक उपभोग्य वस्तु तथा खाद्यान्न खरिद–बिक्री गर्दै आएका छन्।