अत्यधिक गर्मीका कारण अमेरिकामा स्वतन्त्रता दिवसका कार्यक्रम प्रभावित, केही स्थगित र रद्द

वाशिङ्गटन डीसी। अमेरिकी राष्ट्रिय मलमा आयोजित ‘ग्रेट अमेरिकन स्टेट फेयर’ अत्यधिक गर्मीका कारण स्थानीय समयअनुसार शुक्रबार दिउँसो एक सूचना जारी गरी स्थगित गरिएको छ। अमेरिकी राजधानीमा अत्यधिक गर्मी छाएको छ, जहाँ तापक्रम १०२ डिग्री फरेनहाइटसम्म पुगेको छ र ताप सूचकाङ्क ११० डिग्री फरेनहाइटभन्दा माथि पुगेको छ।

अभियानको आयोजक फ्रिडम–२५० ले एक्समा पोस्ट गर्दै चर्को गर्मी मौसमको अवस्थाका कारण महोत्सव पाँच बजेसम्म बन्द रहने जानकारी दिएको छ। साँझको कार्यक्रमको तयारी जारी राख्दै फ्रिडम–२५० ले भनेको छ, ‘गर्मीका कारण र सार्वजनिक सुरक्षा अधिकारीहरूसँगको समन्वयमा, ग्रेट अमेरिकन स्टेट फेयर आज ५ः०० बजेसम्म अस्थायी रूपमा बन्द गरिनेछ। हाम्रा अतिथि, स्वयंसेवक, कलाकार, विक्रेता र स्टाफको सुरक्षा र कल्याण हाम्रो सर्वोच्च प्राथमिकता हो। दिउँसो पछितिर अवस्था सुधारिने अपेक्षा गरिएको छ र हामी ५ः०० बजेदेखि सबैलाई फेरि स्वागत गर्न उत्सुक छौँ।’