लागुऔषध नियन्त्रणका लागि बलियो कानूनी संरचना आवश्यक: गगन थापा

काठमाडौँ । नेपाली कांग्रेसका सभापति गगनकुमार थापाले लागुऔषध दुरुपयोग तथा अवैध ओसारपसार नियन्त्रण गर्न देशमा बलियो कानूनी संरचना आवश्यक रहेको बताएका छन्। शुक्रवार पार्टी केन्द्रीय कार्यालय सानेपामा आयोजित लागुऔषध दुरुपयोग तथा अवैध ओसारपसारविरुद्धको अन्तरक्रिया कार्यक्रममा बोल्दै उनले यस्तो धारणा राखेका हुन्।

सभापति थापाले सरकारले लागुऔषध नियन्त्रणसँगै अन्य महत्त्वपूर्ण विधेयकहरू संसद्मा नल्याए राजनीतिक रूपमा दबाब बढाउनुपर्ने समेत बताए। लागुऔषध दुरुपयोग र अवैध ओसारपसार नियन्त्रणका लागि कानूनी तथा नीतिगत सुधार, प्रभावकारी कार्यान्वयन र सुरक्षा निकायको क्षमता अभिवृद्धि गर्नुपर्नेमा उनले विशेष जोड दिए। विगतमा बनेका कानूनहरूले संघीय शासन व्यवस्थाअनुसार संघ, प्रदेश र स्थानीय तहबीचको जिम्मेवारी स्पष्ट रूपमा समेट्न नसकेको उनको भनाइ थियो।