नगर प्रहरीले दुर्व्यवहार गरेको भिडिओ भाइरल भएपछि पीडित महिलालाई १० हजार रुपैयाँ क्षतिपूर्ति

काठमाडौँ । वीरेन्द्रनगरमा काफल बेचिरहेकी एक महिलामाथि नगर प्रहरीले दुर्व्यवहार गरेको भिडिओ सामाजिक सञ्जालमा भाइरल भएपछि नगरपालिकाले पीडितलाई क्षतिपूर्ति दिएको छ । वीरेन्द्रनगर नगरपालिकाकी मेयर मोहनमाया ढकाल भण्डारीले बुधबार ती महिलालाई कार्यालयमा बोलाएर १० हजार रुपैयाँ नगद, नयाँ डालो र काफलसहित क्षतिपूर्ति दिएकी हुन् ।

मेयर ढकालले टेकपानासँग भनिन्, “कालिकोट घर भई हाल वीरेन्द्रनगर-३ मा बस्दै आउनुभएकी ती महिलामाथि घटना भएको जानकारी पाएपछि हामीले उहाँलाई नगरपालिकामा बोलाएका हौँ ।” नगरपालिकाले अत्यधिक भिडभाड हुने स्थानका सडक पेटीमा व्यापार गर्न निषेध गरेको र सोही क्रममा फुटपाथ व्यवस्थापन गर्दा उक्त घटना भएको उनले सुनाइन्।