रसुवा बाढीमा बेपत्ता ४७ कर्मचारीको पहिचानका लागि 'डीएनए' को नमुना दिन प्राधिकरणको आग्रह

काठमाडौँ । रसुवाको भोटेकोशी नदीमा भदौ १० गते आएको विनाशकारी बाढीका कारण नेपाल विद्युत् प्राधिकरणका विभिन्न आयोजनामा कार्यरत ४७ जना कर्मचारीहरू अझै सम्पर्कविहीन छन् । प्राधिकरणले बेपत्ता कर्मचारीहरूको खोज तथा उद्धार कार्यलाई तीव्रता दिए पनि धेरैको अवस्था अझै अज्ञात रहेकाले पहिचानका लागि 'डीएनए' परीक्षणको प्रक्रिया सुरु गरेको छ ।

प्राधिकरणका अनुसार बाढीले माथिल्लो त्रिशुली ३ ए, त्रिशुली ३ बी हब, चिलिमे–त्रिशुलीलगायत संरचनामा ठुलो क्षति पुर्‍याएको छ । खोज तथा उद्धारका क्रममा हालसम्म माथिल्लो त्रिशुली ३ ए बाट दुई जनाको सकुशल उद्धार गरिएको छ भने एक जनाको शव प्राप्त भएको छ । बाँकी ४७ जना कर्मचारीहरू अझै फेला परेका छैनन् ।