उत्तर कोरियाद्वारा परमाणु बम इन्धन उत्पादन केन्द्र सार्वजनिक

काठमाडौं । उत्तर कोरियाले परमाणु बमका निम्ति आवश्यक पर्ने इन्धन उत्पादन गर्ने एउटा नयाँ केन्द्र बिहीबार सार्वजनिक गरेको छ । सार्वजनिक गर्ने अवसरमा उत्तर कोरियाका सर्वोच्च नेता किम जोङ उनले देशको परमाणु शक्तिलाई तीव्र गतिमा सुदृढ पार्ने योजनाको घोषणा पनि गरेका छन् ।

उत्तर कोरियाको आधिकारिक सञ्चारमाध्यम कोरियाली केन्द्रीय समाचार एजेन्सी (केसीएनए)का अनुसार, बुधबार उक्त स्थलको भ्रमणपछि किमले आफू र अरू उच्च अधिकारीहरूले राज्यको परमाणु शक्तिलाई तीव्र गतिमा विस्तार गर्नका निम्ति तयार पारिएको महत्त्वाकांक्षी भावी योजना कार्यान्वयन गर्ने प्राथमिकताको क्रमलाई स्वीकृत गरेका बताएका छन् ।