न्यायिक समाचार सम्प्रेषणमा थप अध्ययन, सावधानी र जिम्मेवारी आवश्यक: प्रधानन्यायाधीश

काठमाडौँ । प्रधानन्यायाधीश डा. मनोजकुमार शर्माले अदालतका फैसला वा आदेश, न्यायिक प्रक्रिया तथा कानुनका विषयहरूलाई यथार्थ र सन्तुलित रूपमा प्रस्तुत गर्न सकिएमा न्यायपालिकाप्रतिको जनविश्वास अझ सुदृढ बन्ने बताएका छन्।

शुक्रबार सर्वोच्च अदालतमा आयोजित अदालत र सञ्चारकर्मीबिचको अन्तर्क्रिया कार्यक्रममा बोल्दै प्रधानन्यायाधीश शर्माले नागरिकको सुसूचित हुने अधिकारको प्रभावकारी कार्यान्वयन स्वतन्त्र, निष्पक्ष र जिम्मेवार सञ्चार माध्यममार्फत नै सम्भव हुने धारणा राखेका हुन्।