मुआब्जा विवाद सुल्झिएसँगै १८ किमी खण्डको निर्माणले लियो गति

काठमाडौँ । लामो समयदेखि जारी मुआब्जासम्बन्धी विवाद समाधान भएसँगै जयनगर–बर्दिबास रेलमार्ग अन्तर्गतको अन्तिम १८ किलोमिटर खण्ड निर्माणले गति लिएको छ। नेपाल रेल्वे कम्पनीका महाप्रबन्धक परिवेश पराजुलीका अनुसार जग्गाको विवाद टुङ्गिएपछि अबको दुई वर्षभित्र बर्दिबाससम्मै रेल सेवा सञ्चालन गर्ने लक्ष्यका साथ निर्माण कम्पनी इरकन इन्टरनेसनलले काम अघि बढाएको छ। अहिले धनुषा र महोत्तरी क्षेत्रमा धमाधम ट्र्याक निर्माणको कार्य भइरहेको छ।

कुल ७० किलोमिटर लामो यस निर्माणाधीन जयनगर–बर्दिबास रेलमार्गमध्ये जयनगरदेखि कुर्था खण्डमा भने २०७८ साल चैत १९ गतेदेखि नै नियमित रूपमा रेल सेवा सञ्चालन हुँदै आएको छ।