एक्सको नयाँ अपडेट : लाइभ स्टुडियो, एनालिटिक्स र पेआउट प्रणाली एकैसाथ

काठमाडौं । सामाजिक सञ्जाल प्लेटफर्म एक्स (X) ले लाइभ स्ट्रिमिङ सेवालाई थप प्रभावकारी बनाउन ‘लाइभ स्टुडियो (Live Studio)’ नामक नयाँ सुविधा सार्वजनिक गरेको छ । कम्पनीले यससँगै लाइभ कन्टेन्ट सिर्जना गर्ने क्रिएटरहरूलाई प्रोत्साहन गर्न नयाँ पेआउट (भुक्तानी) मोडेल समेत ल्याउने घोषणा गरेको छ ।

एक्सका अनुसार नयाँ सुविधाले क्रिएटरहरूलाई लाइभ स्ट्रिम सुरु गर्न, शीर्षक र थम्बनेल सेट गर्न, प्रसारणको समय निर्धारण गर्न तथा लक्षित दर्शक छनोट गर्न सहज बनाउनेछ । साथै, लाइभ प्रसारणका क्रममा दर्शक संख्या, कमेन्ट, दर्शकको देश तथा प्रयोग भइरहेको डिभाइसजस्ता विश्लेषणात्मक तथ्याङ्क (एनालिटिक्स) पनि उपलब्ध हुनेछ ।