मौद्रिक नीति लचिलो बनाउन पूर्वगभर्नरको सुझाव

नेपाल राष्ट्र बैंकका पूर्वगभर्नर महाप्रसाद अधिकारीले आगामी आर्थिक वर्षको मौद्रिक नीति लचिलो तथा विस्तारकारी बनाउनुपर्ने बताएका छन्। उनले वर्तमान आर्थिक सूचकहरू सकारात्मक रहेकाले मौद्रिक नीतिलाई थप कसिलो बनाइरहनुपर्ने आवश्यकता नभएको बताए।

आइतबार प्रतिनिधिसभाअन्तर्गतको अर्थ समितिमा आगामी मौद्रिक नीतिबारे आयोजित छलफलमा बोल्दै अधिकारीले नेपालको मूल्यस्थिति र बाह्य क्षेत्रको स्थायित्व सुदृढ रहेकाले सहज मौद्रिक नीति स्वाभाविक हुने बताए । वर्तमान अवस्थामा नीतिगत दर वा ब्याजदर करिडोरलाई थप कसिलो बनाउनु आवश्यक नदेखिएको भन्दै उनले मौद्रिक नीति प्राविधिक र अनुमानयोग्य विषय भएकाले आर्थिक आधारका आधारमा नीति निर्माण हुनुपर्ने बताए।