कोरला सडक स्तरोन्नति सुरु, जोमसोम–कागबेनी खण्ड सुधारमा ७ करोड खर्च

मुस्ताङ- राष्ट्रिय गौरवको कालिगण्डकी करिडोरअन्तर्गत बेनी–जोमसोम–कोरला सडक आयोजनाले जोमसोम–कागबेनी सडकखण्डको स्तरोन्नति सुरु गरेको छ । उत्तर–दक्षिण जोड्ने कोरला नाकातर्फको ९ किलोमिटर सडक सुधारका लागि करिब ७ करोड रुपैयाँ लागतमा काम अघि बढाइएको हो ।

आयोजनाका अनुसार विसं २०७६ अघि निर्माण सम्पन्न भएको जोमसोम–कोरला सडकखण्डमा वर्षा, पहिरो तथा आवश्यक संरक्षण संरचना अभावका कारण विभिन्न स्थानमा क्षति पुगेपछि स्तरोन्नतिको काम थालिएको हो । गत वर्षको साउनमा केही स्थानमा सडक भासिएको थियो भने ड्रेन, सडक बाल तथा संरक्षण संरचना नहुँदा सडक थप जोखिममा परेको थियो ।