राउटे समुदाय जोगाउन कर्णाली सरकारको यस्तो छ विशेष नीति

सुर्खेत । कर्णाली प्रदेश सरकारले लोपोन्मुख राउटे समुदायको अस्तित्व, पहिचान, भाषा, संस्कृति तथा मानव अधिकार संरक्षणका निम्ति ‘लोपोन्मुख राउटे समुदायको मूलप्रवाहीकरण नीति, २०८३’ ल्याएको छ । पछिल्लो दशकमा राउटे समुदायको जनसंख्या तीव्र रूपमा घट्दै गएपछि उनीहरूको संरक्षण, सशक्तीकरण र सम्मानजनक जीवनयापन सुनिश्चित गर्ने उद्देश्यले प्रदेश सरकारले विशेष नीति ल्याएको हो ।

०६८ सालको राष्ट्रिय जनगणनामा राउटे समुदायको जनसंख्या ६१८ थियो । ०७८ सालको जनगणनामा यो संख्या घटेर १३४ जनामा सीमित भएको छ । घट्दो जनसंख्या, बढ्दो मृत्युदर, कुपोषण, स्वास्थ्य सेवाको अभाव तथा बाह्य प्रभावका कारण अस्तित्व नै संकटमा परेको निष्कर्षसहित कर्णाली सरकारले राउटे समुदायका निम्ति यो नीति निर्माण गरेको हो ।