विदेशी सहयोग लिनु कमजोरी हो ?

भदौ १० गतेको बाढीले नुवाकोट र रसुवाका बस्ती, पुल र जलविद्युत् आयोजनाहरू क्षणभरमै पुरिए । केही जलविद्युत् आयोजनामा कार्यरत सयौँ नेपाली तथा विदेशी कामदार बाढीपछि सम्पर्कविहीन भएका थिए । तीमध्ये अधिकांश सुरुङभित्र फसेको आशंका गरिएको थियो । शुरुदेखि नै विदेशी विशेषज्ञ टोली, जलविद्युत् आयोजनाका इन्जिनियर तथा प्राविधिक, नेपाली सेना र विपद् व्यवस्थापनका विशेषज्ञलाई एउटै कमान्ड संरचनामा परिचालन गरिएको भए, उद्धार अझ छिटो, समन्वित र प्रभावकारी हुन सक्थ्यो ।

विदेशी सहयोगको प्रारम्भिक अस्वीकार, उपलब्ध विशेषज्ञताको समयमा उपयोग गर्न नसक्नु र उद्धार व्यवस्थापनमा देखिएको कमजोरीले जीवन बचाउन सकिने सबैभन्दा महत्वपूर्ण ‘गोल्डेन पिरियड’ गुमायौँ । विपद्मा केही घण्टाको ढिलाइ केवल समयको क्षति मात्र हुँदैन, त्यो कहिलेकाहीँ कसैको जीवन र मृत्युबीचको दूरी बन्न पुग्छ । यो विपद्ले नेपालको विपद् व्यवस्थापन क्षमताको कमजोर पक्ष देखाइदिएको छ । यही घटनाले फेरि एउटा सवाल हाम्रो अगाडि उभ्याएको छ– के आफ्नो क्षमता अपुग हुँदा विदेशी सहयोग लिनु कमजोरी हो ?