नेकपाको अडान- विधिको शासन पालना खोजेका हौँ, प्रधानमन्त्री संविधान भन्दा माथि छैनन्

काठमाडौं । नेकपा एमालेका प्रमुख सचेतक युवराज दुलालले संसद्मा आज आफूहरूले विधिको शासनको पालनाको लागि पहल गरेको बताएका छन्। सदनमा प्रधानमन्त्री उपस्थित हुनुपर्ने अडान राख्दै सदन अवरोध गरेपछि दुलालले संविधान र विधिको पालना गर्नुपर्ने बताए।

उनले भने, ‘प्रतिनिधिसभा नियमावली २०७९ को नियम ५६ (१) मा “प्रधानमन्त्री वा निजको कार्यक्षेत्रसँग सम्बन्धित महत्त्वपूर्ण विषयमा प्रश्न सोध्नको लागि सभामुखले प्रत्येक महिनाको पहिलो हप्ताको कुनै एक दिनको बैठकको पहिलो एक घण्टा निर्धारण गर्नेछ । तर उक्त दिन कुनै कारणवश बैठक बस्न नसकेमा त्यसपछि लगत्तै बस्ने बैठकको पहिलो १ घण्टाको समय निर्धारण गर्नेछ” भन्ने व्यवस्था रहेको र यो प्रश्नको जवाफ प्रधानमन्त्रीले तत्काल (पछि होइन) दिनु पर्ने व्यवस्था रहेकोमा, सभामा यो कार्य नभई नियमावली विपरीत कार्य हुन गएकोले हामीले नियमको पालनाको लागि सदनमा प्रश्न उठाएका हौँ ।’